Tere naam ki kavita

Ye tere naam ki kavita hai
Tera naam
Jo aur naamon jaisa nahin
Atyant vichitr
Atyant anokha
Atyant nirala

Kambakht! bhulaya bhi nahin jaata
Kabhi sochti hun
Tere jism ki khushbu kaisi hogi
Aur Teri hasi ki awaaz
Atyant uljhaate hain mujhe ye khayal

Aur uljhaatein hain kuch sawal
Jinke jawab kabhi bane hi nahin
Par khwaab wo gufa hain
Jinke atyant andhere mein
Jo chahe dekhlo
Jugnu, sher ki aakhein, kankaal khopdiyaan,
Bina sawal, bina jawab

Kaisa lagta tera naam pukarna
Ek kamre se dusre kamre mein
Ya chillana atyant zor se
chakkar khate hue pahadon ke Kono se
Atyant ajeeb 

Aur jab tu chuta mujhe
Meri tez chalti saanson mein
Kaise leti main naam tera
Atyant ahista se
Atyant bikhre hue alfazon mein
Atyant pyaar se
Atyant mein